ដោយៈវឌ្ឍនៈ
ភ្នំពេញៈ ក្នុងរយៈពេលប៉ុន្មានឆ្នាំចុងក្រោយនេះ ការវិនិយោគនៅក្នុងខេត្តកំពង់ស្ពឺហាក់ទទួលបានកំណើនល្អប្រសើរ ជាពិសេសទៅលើរោងចក្រឧស្សាហកម្ម ដែលធ្វើឱ្យអភិបាលខេត្តមួយនេះ បានបង្ហាញក្ដីព្រួយបារម្ភ ចំពោះកង្វះខាតកម្មករបម្រើការតាមរោងចក្រ។
អ្នកជំនាញនៃវិស័យអចលនទ្រព្យប្រចាំខេត្តមួយនេះ បានមើលឃើញថា ការបណ្ដាក់ទុនវិនិយោគកាន់តែច្រើន នៅក្នុងខេត្តមួយនេះនឹងផ្ដល់ប្រយោជន៍ដល់បណ្ដាខេត្តផ្សេងផងដែរ។
លោកប៊ូ សេងហូ ប្រធានក្រុមហ៊ុនអចលនទ្រព្យ Century 21 Zillion Holding ប្រចាំខេត្តកំពង់ស្ពឺបានឱ្យដឹងតាមទូរស័ព្ទនាព្រឹកថ្ងៃទី៣១ ឧសភានេះថា ការវិនិយោគកាន់តែច្រើន នៅក្នុងខេត្តកំពង់ស្ពឺ មិនត្រឹមតែផ្ដល់ប្រយោជន៍ដល់ពលរដ្ឋក្នុងខេត្តនេះទេ តែនឹងផ្ដល់ប្រយោជន៍ដល់ប្រជាពលរដ្ឋនៅបណ្ដាខេត្តជាច្រើនទៀត។
លោកបន្តថា "នៅពេលកំនើនវិនិយោគកាន់តែច្រើន នឹងធ្វើឱ្យមានតម្រូវការលើបុគ្គលិក និងកម្មករសម្រាប់បម្រើការ ហើយបើពឹងទៅលើខេត្តកំពង់ស្ពឺមួយ ក៏មិនអាចផ្គត់ផ្គង់កំលាំងពលកម្មកគ្រប់ ទៅតាមតម្រូវការនោះដែរ ដូច្នេះចង់មិនចង់ក៏ត្រូវការយកកំលាំងពលកម្ម ពីខេត្តផ្សេងមកធ្វើការបន្ថែម"។
លោកប៊ូ សេងហូបានបន្តថា កំណើនរោងចក្រកាន់តែច្រើននៅក្នុងខេត្តកំពង់ស្ពឹ ក៏នឹងធ្វើឱ្យមានកំណើនដីធ្លីបន្ថែមផងដែរ ហើយវាមិនមែនសម្រាប់តែសង់រោងចក្រប៉ុណ្ណោះទេ តែដីសម្រាប់សង់ផ្ទះជួលជូនកម្មករ កម្មការិនី ដីសម្រាប់សាងសង់ជាផ្សា រលក់ទំនិញជូនបុគ្គលិក ឬកម្មករ និងដីសម្រាប់អភិវឌ្ឍន៍ផ្សេងទៀត។ ដូច្នេះហើយការវិនិយោគទាំងនេះ នឹងហុចផលប្រយោជន៍កាន់តែច្រើន ដល់ប្រជាពលរដ្ឋក្នុងតំបន់នេះផ្ទាល់ ក៏ដូចជាតំបន់ជិតខាងផងដែរ។
លោកបន្ថែមថា រហូតមកដល់ពេលនេះ តាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាបង្ហាញថា ការវិនិយោគ នៅក្នុងខេត្តកំពង់ស្ពឺមិនទាន់បញ្ចប់ត្រឹមនេះទេ ដោយយើងបានឃើញក្រុមប្រឹក្សាអភិវឌ្ឍន៍បានចេញវិញ្ញាបនបត្រវិនិយោគ ជាបន្តបន្ទាប់នៅកម្ពុជា ហើយមួយចំនួនក៏មានមូលដ្ឋាននៅក្នុងខេត្តកំពង់ស្ពឺផងដែរ។
អគ្គនាយកក្រុមហ៊ុនអចលនទ្រព្យ Advance លោកប៉ូ អ៊ាវគង់ បានលើកឡើងផងដែរថា តំបន់តាមបណ្ដោយផ្លូវជាតិលេខ៤ រួមមានខេត្តកណ្ដាលខេត្តកំពង់ស្ពឺ គឺជាតំបន់ដែលមានសក្ដានុពលខ្ពស់ ក្នុងការវិនិយោគលើឧស្សាហកម្មរោងចក្រ ដើម្បីផលិតនូវទំនិញសម្រាប់នាំចេញ ដោយសារតែតំបន់ទាំងនេះជាតំបន់ដែលមានភាព ងាយស្រួលក្នុងការដឹកជញ្ជូនទំនិញចេញទៅកំពង់ផែស្វយ័តក្រុងព្រះសីហនុ ហើយអនាគតក៏នឹងដឹកទៅកាន់កំពង់ទឹកជ្រៅមួយនៅក្នុងខេត្តកំពត ដែលអាចនឹងជំរុញឱ្យការវិនិយោគនៅតំបន់នោះកាន់តែមានសន្ទុះបន្ថែមទៀតផងដែរ៕
No comments:
Post a Comment