ដោយៈ សុខុម
ប៉េកាំង: ខេត្តនានារបស់ចិន កំពុងដុតដៃដុតជើង ដើម្បីបោះផ្សាយលក់មូលបត្របំណុល ក្នុងទំហំរហូតដល់២២៥ពាន់លានដុល្លារ នៅខែមិថុនា ដើម្បីស្ដារសេដ្ឋកិច្ចដែលរងការប៉ះពាល់ធ្ងន់ធ្ងរពីវិបត្តិកូវីដ-១៩។
គណៈរដ្ឋមន្ត្រីចិន បានបង្ហាញសេចក្ដីព្រាងវិធានការ គោលនយោបាយជាច្រើនកាលពីសប្តាហ៍មុន ដើម្បីគាំទ្រដល់សេដ្ឋកិច្ច ដែលទទួលរងផលប៉ះពាល់ធ្ងន់ធ្ងរ ដោយសារវិធានការដ៏តឹងរ៉ឹង នៅក្នុងការទប់ស្កាត់ការរីករាលដាលវីរុសកូវីដ-១៩ ប៉ុន្តែក្រុមអ្នកវិភាគជឿថា ប្រទេសចិន នឹងត្រូវការកញ្ចប់ថវិកាបន្ថែមទៀត ដើម្បីជួយទ្រទ្រង់ការងើបឡើងវិញនៃសេដ្ឋកិច្ច។
គណៈរដ្ឋមន្ត្រីនេះបានប្រាប់រដ្ឋបាលថ្នាក់មូលដ្ឋាន នៅថ្ងៃអង្គារ ទី៣១ ខែឧសភា នេះថា ធ្វើយ៉ាងណាឱ្យការបោះផ្សាយមូលបត្របំណុល ពិសេសចំនួន៥១៨ពាន់លានដុល្លារ សម្រាប់គម្រោងហេដ្ឋារចនាសម្ព័ន្ធត្រូវបញ្ចប់នៅត្រឹមដំណាច់ខែមិថុនា ដោយរុញពេលវេលាកំណត់ទៅមុខ៣ខែ ក្នុងគោលបំណងជំរុញការវិនិយោគ។
នេះមានន័យថា ខេត្តនានានឹងត្រូវបោះផ្សាយមូលបត្រ បំណុល២២៥ពាន់លានដុល្លារ នៅប៉ុន្មានសប្តាហ៍ខាងមុខនេះ។ ថវិកាដែលបានពីការបោះផ្សាយមូលបត្របំណុលទាំងនេះ នឹងត្រូវប្រើប្រាស់នៅត្រឹមដំណាច់ខែសីហា។
ក្រុមអ្នកវិភាគនៅក្រុមហ៊ុនមូលបត្រចិន Guosheng Securities បានលើកឡើងថា ចំណាត់ការនេះអាចនឹងបង្កើនសម្ពាធ លើសាច់ប្រាក់ងាយស្រួលក្នុងទីផ្សារ និងបង្ខំឱ្យធនាគារកណ្តាលចិន បញ្ចេញសាច់ប្រាក់បន្ថែមទៀត។
ក្រុមអ្នកវិភាគនិយាយថា ថវិកានេះអាចត្រូវបានប្រើប្រាស់ ដើម្បីគាំទ្រដល់ការជំរុញពង្រីកហេដ្ឋារចនាសម្ព័ន្ធថ្មីៗ ដែលផ្តោតលើបច្ចេកវិទ្យា 5G បញ្ញាសិប្បនិមិត្ត (AI) និងទិន្នន័យ ដោយសារតែគម្រោងដដែលៗដូចជាផ្លូវហាយវ៉េ ផ្លូវដែក និងអាកាសយានដ្ឋានជាដើម ផ្ដល់ប្រាក់ចំណេញតិចជាងឆ្ងាយនាពេលបច្ចុប្បន្ន។
គណៈរដ្ឋមន្ត្រីចិន បាននិយាយនៅថ្ងៃអង្គារ ទី៣១ ខែឧសភា នេះថា ខ្លួនបានអនុម័តគម្រោងថាមពល និងគម្រោងហេដ្ឋារចនាសម្ព័ន្ធប្រភេទថ្មីៗជាច្រើន៕ Reuters៕
No comments:
Post a Comment