ដោយៈគង់ សូរិយា
ភ្នំពេញៈ មជ្ឈមណ្ឌលបណ្តុះបណ្តាល Lanmei Training Center នៅកម្ពុជា ក្រោមកិច្ចសហប្រតិបត្តិការ ជាមួយកងទ័ពជើងអាកាស បានបើកឱ្យមានការហោះហើរជាលើកដំបូងរបស់ខ្លួន។
មជ្ឈមណ្ឌលនេះ ស្ថិតនៅមូលដ្ឋានកងទ័ពជើងអាកាសកម្ពុជា បន្ទាប់ពីបានបណ្តុះបណ្តាលដល់និស្សិតនាពេលកន្លងមកនេះ។
លោកគង់ មុនី នាយសេនាធិការ និងជាមេបញ្ជាការរងកងទ័ពជើងអាកាសបានថ្លែងក្នុងពិធីបើកការហោះហើរបង្ហាញ និងផ្សព្វផ្សាយកាលពីដើមសប្តាហ៍នេះថា ការហោះហើរជាលើកដំបូងនេះ ក្រោមកិច្ចសហការ រវាងកងទ័ពជើងអកាស និងមជ្ឈមណ្ឌលឡានមី ដែលជាផែនការយុទ្ធសាស្ត្រក្នុងរយៈពេលវែង ក្នុងការបណ្តុះបណ្តាលធនធានមនុស្សកម្ពុជាក្នុងវិស័យហោះហើរ ក៏ដូចជាផ្នែកជួសជុលបច្ចេកទេស និងបញ្ជាយន្តហោះនៅក្នុងប្រទេសកម្ពុជា។
លោកបន្តថា "នេះជាការរួមចំណែកក្នុងការកសាងធនធានមនុស្ស ជាពិសេស ផ្នែកជំនាញអាកាសយានិក (Pilots) នៅក្នុងវិស័យអាកាសចរណ៍កម្ពុជា ឱ្យមានទាំងបរិមាណ និងគុណភាព ឱ្យដូចទៅនឹងបណ្តាប្រទេសនៅក្នុងតំបន់ និងនៅលើពិភពលោក"។
លោកគង់ មុនីបានបានបន្តថា កម្ពុជាកំពុងតែមានការអភិវឌ្ឍ ផ្នែកអាកាសចរណ៍ស៊ីវិល ដូចនៅក្នុងប្រទេសក្នុងតំបន់ និងនៅលើពិភពលោក ដែលតម្រូវការធនធានមនុស្ស ក្នុងស្រុកនៅក្នុងវិស័យនេះត្រូវតែមានជាចាំបាច់។
ជាមួយគ្នានេះ លោក ចាន់ ជីសេង ប្រធានក្រុមប្រឹក្សាភិបាលនៃមជ្ឈមណ្ឌលប ណ្តុះបណ្តាលឡានមីបានមានប្រសាសន៍ឲ្យដឹងផងដែរ ថា ការបើកមជ្ឈមណ្ឌលបណ្តុះណ្តាលធនធានមនុស្ស ផ្នែកជំនាញអាកាសយានិក ធ្វើឡើងដោយសារតែកម្ពុជា មានការខ្វះខាតធនធានមនុស្ស ផ្នែកជំនាញនេះ ជាជនជាតិខ្មែរ ខណៈវិស័យអាកាសចរណ៍ស៊ីវិលរបស់កម្ពុជា មានការរីកចម្រើន។
មជ្ឈមណ្ឌលនេះ គឺសម្រាប់បម្រើឱ្យនិស្សិតកម្ពុជា ដោយពួកគេមិនចាំបាច់ទៅរៀន នៅក្រៅប្រទេសនោះទេ គឺអាចរៀននៅក្នុងស្រុកបាន ដើម្បីបំពេញតម្រូវការផ្នែកវិស័យអាកាសចរណ៍របស់កម្ពុជា។ កន្លងមកនេះ កម្ពុជាមានការខ្វះខាតផ្នែកអាកាសយានិក វិស្វករ ពហុនិការ ដែលភាគច្រើនជាជនជាតិបរទេស៕
No comments:
Post a Comment