ដោយៈ ម៉ាណេត

ភ្នំពេញៈ ស្ថានភាពទូតចក្រភពអង់គ្លេស ប្រចាំកម្ពុជាបានប្រកាសថា ខ្លួនកំពុងធ្វើការយ៉ាងជិតស្និទ្ធិជាមួយរដ្ឋាភិបាលកម្ពុជា ដើម្បីប្រយុទ្ធប្រឆាំងនឹងជំងឺកូវីដ១៩ ខណៈវ៉ាក់សាំង AstraZeneca ចំនួន៤១៥,០០០ដូស របស់ខ្លួន នឹងត្រូវបញ្ជូនមកដល់ប្រទេសកម្ពុជានៅសប្តាហ៍ក្រោយ។

លោកស្រីTina Redshawឯកអគ្គរាជទូតចក្រភពអង់គ្លេសប្រចាំកម្ពុជា បានថ្លែងសារតាមរយៈវីដេអូខ្លីមួយ នៅថ្ងៃល្ងាចថ្ងៃទី៣០ ខែកក្កដា ឆ្នាំ២០២១ យើងទាំងអស់គ្នាដឹងថា ជំងឺទាំងអស់មិនគោរពព្រដែននោះទេ។ ជំងឺកូវីដ១៩ គឺជាបញ្ហាសកលដែលទាមទារឱ្យមានដំណោះស្រាយជាសកល។ ដូច្នេះហើយបានជាចក្រភពអង់គ្លេសកំពុងរួមចំណែកយ៉ាងសំខាន់ ក្នុងការប្រយុទ្ធជាសកលប្រឆាំងនឹងជំងឺកូវីដ១៩។

លោកស្រីបានថ្លែងថា "ខ្ញុំពិតជារីករាយ ដែលយើងកំពុងធ្វើការយ៉ាងជិតស្និទ្ធិជាមួយរដ្ឋាភិបាលកម្ពុជា ដើម្បីប្រយុទ្ធប្រឆាំងនឹងជំងឺកូវីដ១៩"។

លោកស្រីបានបន្តថា បន្ទាប់ពីការចុះហត្ថលេខា លើកិច្ចព្រមព្រៀងទេ្វភាគីជាមួយក្រសួងសុខាភិបាលកាលពីថ្ងៃចន្ទនេះ វ៉ាក់សាំងAstraZeneca ចំនួន៤១៥,០០០ដូស នឹងត្រូវបញ្ជូន មកដល់ប្រទេសកម្ពុជានៅសប្តាហ៍ក្រោយ។ វានឹងជួយពង្រីក និងពន្លឿនកម្មវិធីចាក់វ៉ាក់សាំងរបស់ប្រទេសកម្ពុជា។

លោកស្រីបានឱ្យដឹងទៀតថា នៅពេលដែលវាកាន់តែសំខាន់ ក្នុងការចាក់វ៉ាក់សាំងមនុស្សឱ្យបានច្រើនបំផុត និងលឿនបំផុត ដែលអាចធ្វើទៅបាន ដើម្បីបញ្ឈប់ការរីករាលដាលនៃជំងឺនេះ ជាពិសេសមេរោគបំលែងថ្មីប្រភេទ Delta ដែលបានរកឃើញថ្មីៗនៅទីនេះ។

កាលពីខែមិថុនា នៅក្នុងកិច្ចប្រជុំកំពូលរបស់មេដឹកនាំប្រទេសG7 នាយករដ្ឋមន្ត្រីរបស់ចក្រភពអង់គ្លេសបានប្រកាសថា ចក្រភពអង់គ្លេសនឹងបរិច្ចាគនូវវ៉ាក់សាំងចំនួន១០០លានដូស ដល់ពិភពលោកក្នុងឆ្នាំខាងមុខនេះ។

លោកស្រីTina Redshawបានឱ្យដឹងថា "ឥឡូវនេះ យើងកំពុងធ្វើការតាមការសន្យានេះ ដើម្បីជួយដៃគូរបស់យើងឱ្យរួចផុតពីជំងឺរាតត្បាត។ គ្មានអ្នកម្នាក់នឹងមានសុវត្ថិភាពទេ រហូតដល់មនុស្សគ្រប់គ្នាមានសុវត្ថិភាព"៕