ដោយៈ គង់ ម៉ាលីនណា
ភ្នំពេញៈ ក្នុងន័យបង្ខិតសេវាកម្មកាន់តែកៀក និងផ្តល់ភាពងាយស្រួលដល់អតិថិជន Wing Master Agent ថ្មីមួយ បានបើកការិយាល័យនៅផ្ទះលេខ៥៦ ផ្លូវប៉ាស្ទ័រ សង្កាត់បឹងកេងកង១ ខ័ណ្ឌបឹងកេងកង រាជធានីភ្នំពេញ។
អ្នកស្រីហេង សុភារី អគ្គនាយិកាWing Master Agentបានមានប្រសាសន៍ឲ្យដឹងបន្ទាប់ ពីបានបើកសម្ភោធសាខារបស់ខ្លួន នាព្រឹកថ្ងៃទី៦ មិថុនានេះថា ការសម្រេចបើកដំណើរការសេវាកម្មWing Master Agentនៅនេះ ដោយសារទីតាំងនេះ ជាទីតាំងសម្បូរអាជីវកម្មនានាជាច្រើនដូចជា ភោជនីយដ្ឋាន សាលារៀន ខុនដូ អាផាតម៉ិន ពិសេសជាតំបន់ដែលសម្បូរជនបរទេសរស់នៅ។
អ្នកស្រីបន្តថា Wing Master Agent មានភាពស្រដៀងគ្នា នឹងធនាគារនានាផងដែរ ដោយយើងមានសេវាកម្មដក ដាក់ប្រាក់ ការសម្របសម្រួលឥណទាន ផ្តល់សេវាកម្មសម្រួលបែបបទ និតិវិធីនានា ដើម្បីឲ្យអតិថិជនងាយស្រួលទទួលបានឥណទាន ពីធនាគារធំរបស់Wingផងដែរ។
អ្នកស្រីបានបន្តថា "អ្វីដែលWing Master Agentរបស់យើងផ្តល់សេវាកម្ម គឺបង្ខិតសេវាកម្មកៀកនឹងអតិថិជន ដោយអតិថិជនមិនចាំបាច់ទៅអង្គុយរង់ចាំយូរនៅធនាគារនោះទេ ពួកគេអាចទទួលបានសេវាកម្ម នៅសាខារបស់យើងបានលឿន និងងាយស្រួល"។
អ្នកស្រីហេង សុភារីបានបន្តទៀតថា ការបើកដំណើរការWing Master Agent គឺយើងជាអ្នកទទួលខុសត្រូវ លើកញ្ចប់ទឹកប្រាក់ឥណទាន ដែលអតិថិជនត្រូវការ និងការដាក់ ឬដកប្រាក់ធ្វើឡើងមិនកំណត់ចំនួនផងដែរ ប៉ុន្តែវាស្ថិតក្រោមសមត្ថកិច្ច និងការទទួលខុសត្រូវរបស់យើង៕
No comments:
Post a Comment