ដោយៈសុខុម
អន្តរជាតិ: សាកស្រមៃទៅមើលថាវាអស្ចារ្យប៉ុណ្ណា បើយើងមានឱកាសបានដេកនៅសណ្ឋាគារក្នុងលំហអវកាស ហើយពេលភ្ញាក់ឡើងឃើញប្រព័ន្ធព្រះអាទិត្យដ៏ល្ហល្ហេវរកទីបំផុតគ្មាន។ តើអ្នកត្រៀមខ្លួនហើយឬនៅ? សម្រាប់ដំណើរកម្សាន្តបះសក់ទៅកាន់អវកាស?។
ក្រុមហ៊ុនអភិវឌ្ឍន៍យានអវកាសOrbital Assembly ដែលមានមូលដ្ឋាននៅសហរដ្ឋអាមេរិក កាលពីពេលថ្មីៗនេះបានទម្លាយព័ត៌មាន និងConcept ថ្មីសម្រាប់ការឌីហ្សាញសណ្ឋាគារ អវកាសរបស់ខ្លួនគួរឱ្យភ្ញាក់ផ្អើល។ នេះបើយោងតាមសារព័ត៌មាន CNN ចុះផ្សាយកាលពីថ្ងៃច័ន្ទ ទី០២ ខែឧសភា។
Concept ខន់សិបឌីហ្សាញ នៃសណ្ឋាគារថ្ងៃអនាគតនេះ មានសណ្ឋានស្រដៀងទោងកន្ត្រកវិល ដោយមានបន្ទប់គេងជាច្រើន ដែលភ្ជាប់គ្នាដោយជណ្ដើរយន្ត ហើយវាធ្វើដំណើរវិលជុំតាមគន្លងរបស់ភពផែនដី។
ក្រុមហ៊ុន Orbital Assembly ពេលនេះមានគម្រោងបាញ់បង្ហោះស្ថានីយអវកាសដល់ទៅ២ឯណោះ នោះគឺយានសណ្ឋា គារ Voyager Station ដែលសមត្ថភាពអាចផ្ទុកមនុស្សបាន៤០០នាក់ ហើយគ្រោងនឹងបើកដំណើរការនៅឆ្នាំ២០២៧ ខណៈខន់សិបថ្មីសម្រាប់យាន Pioneer Station ដែលមានសមត្ថភាពផ្ទុកមនុស្សបាន២៨នាក់ អាចនឹងដំណើរការក្នុងរយៈពេលត្រឹមតែ៣ឆ្នាំ។
ក្រុមហ៊ុននិយាយថា គោលដៅនេះ គឺដើម្បីឈានទៅដល់ការដំណើរការ "សួនឧស្សាហកម្ម" អវកាសសម្រាប់ផ្ទុកការិយាល័យ ព្រមទាំងភ្ញៀវទេសចរផងដែរ។
ទេចរណ៍ទៅកាន់ទីអវកាស កាន់តែខិតជិតក្លាយជាការពិត ក្នុងរយៈពេលមួយឆ្នាំមកនេះ ក្រោយកំពូលមហាសេដ្ឋីអង់គ្លេស Richard Branson ដែលជាស្ថាបនិកក្រុមហ៊ុន Virgin Group បានធ្វើដំណើរទៅកាន់អវកាស ជាមួយក្រុមហ៊ុនរបស់លោកឈ្មោះ Virgin Galactic ខណៈតារាសម្ដែង William Shatner ក្នុងខ្សែភាពយន្តប្រឌិតបែបវិទ្យាសាស្ត្ររឿង Star Trek បានក្លាយជាមនុស្សចំណាស់បំផុត ដែលបានធ្វើដំណើរទៅកាន់អវកាសជាមួយក្រុមហ៊ុន Blue Origin។
ប៉ុន្តែដោយសារថ្លៃសំបុត្រ សម្រាប់ដំណើរកម្សាន្តទៅកាន់អវកាសថ្លៃកប់ពពកស្ទើរមិនគួរឱ្យជឿ គឺទាល់តែលំដាប់មហាសេដ្ឋី ទើបមានវាសនាបានទៅលេង។
ទោះជាយ៉ាងណា លោក Tim Alatorre ប្រធានផ្នែកប្រតិបត្តិការនៃក្រុមហ៊ុន Orbital Assembly បានលើកឡើងថា លោកយល់ថា រឿងសំបុត្រដំណើរកម្សាន្តថ្លៃ នឹងលែងជាឧសបគ្គទៀតហើយ នៅពេលទេសចរណ៍អវកាសដំណើរការបានស្រួលបួល៕ CNN៕
No comments:
Post a Comment