ដោយៈ សុផារី

ភ្នំពេញៈ លោកFumio Kishida នាយករដ្ឋមន្ត្រីជប៉ុន នឹងអញ្ជើញមកបំពេញទស្សនកិច្ចនៅកម្ពុជា នៅថ្ងៃទី២០និង២១ ខែមីនា ឆ្នាំ២០២២។នេះបើតាមសារព័ត៌មានក្នុងស្រុក Japan Times ដែលបានចេញផ្សាយនៅថ្ងៃនេះ។

ដំណើរទស្សនកិច្ចរបស់លោកនាយករដ្ឋមន្ត្រីជប៉ុន ធ្វើឡើងតបតាមការអញ្ជើញរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីពេលថ្មីៗកន្លងមក។

ប្រភពដដែលបានឱ្យដឹងថា ក្នុងជំនួបជាមួយសម្តេចតេជោ ហ៊ុន សែន លោក ហ្វូមីអូ គីស៊ីដា នឹងស្នើសុំការគាំទ្រ ពីសំណាក់បណ្តាប្រទេសអាស៊ីអាគ្នេយ៍ លើបញ្ហាអធិបតេយ្យភាព និងបូរណភាពទឹកដី របស់ប្រទេសអ៊ុយក្រែន។

យ៉ាងណាក្តី រហូតមកដល់ពេលនេះ ទាំងស្ថានទូតជប៉ុន និងក្រសួងការបរទេសកម្ពុជា នៅមិនទាន់មានការជូនព័ត៌មាន នៃកម្មវិធីលំអិតនៃដំណើរទស្សនកិច្ច របស់លោកនាយករដ្ឋមន្ត្រីជប៉ុន នៅក្នុងប្រទេសកម្ពុជានៅឡើយទេ។

ដំណើរទស្សនកិច្ចរបស់លោក ហ្វូមីអូ គីស៊ីដា នៅកម្ពុជានាពេលនេះ ត្រូវបានគេមើលឃើញថា ជាការអបអរសាទរខួប៣០ឆ្នាំ ដែលជប៉ុនបានបញ្ជូនកងកម្លាំងស្វយ័ការពារមកកាន់កម្ពុជា ហើយក៏ជាការអបអរសាទរខួប៧០ឆ្នាំ នៃទំនាក់ទំនងកម្ពុជា-ជប៉ុនផងដែរ ព្រមទាំងរួមចំណែកធ្វើឱ្យទំនាក់ទំនងកម្ពុជា-ជប៉ុន កាន់តែល្អប្រសើរថែមមួយកម្រិតទៀត៕