ដោយៈគង់ សូរិយា

ភ្នំពេញៈ លោកទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូនបានថ្លែងឲ្យដឹងពីវឌ្ឈនភាព នូវគំរោងពង្រីកផ្លូវវជាតិលេខ៧ និងការជួសជុលផ្លួវជាតិលេខ៨។

លោកបានមានប្រសាសន៍កាលពីសប្តាហ៍មុន ក្នុងកិច្ចប្រជុំទាក់ទងនឹងបញ្ហាចរាចរណ៍ ក្រោមអធិបតីសម្តេចក្រឡាហោមស ខេងឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃថា គំរោងពង្រីកផ្លូវជាតិលេខ៧ ពីទីប្រជុំជនស្គន់ ក្នុងស្រុកជើងព្រៃ ខេត្តកំពង់ចាម ទៅកាន់ក្រុងកំពង់ចាម ដែលគ្រោងពង្រីកជាបួនគន្លង គឺក្រសួងបានចចារបញ្ចប់ ជាមួយក្រុមហ៊ុនចិនរួចហើយ ដោយលោកបានស្នើសុំឲ្យក្រុមហ៊ុនចិន បំពាក់កាម៉េរ៉ាបីកន្លែងនៅលើផ្លូវនេះ។

លោកបន្តថា ជាមួយគ្នានេះ តាមរយៈក្រសួងសេដ្ឋកិច្ច និងហិរញ្ញវត្ថុបានផ្តល់ថវិកា ជួសជុលផ្លូវនេះពីរង្វង់មូលព្រែកតាមាក់ ទៅរង្វង់មូលស្វាយអន្ទរប្រវែង៥៥គីឡូម៉ែត្រ និងផ្លូវនេះនឹងត្រូវពង្រីកពីរ២ ទៅបួនគន្លងប្រវែង២,៥គីឡូម៉ែត្រ និងរៀបចំជួសជុសបែប DBST ជាបណ្តោះអាសន្នសិន ដោ​យរង់ចាំថវិកាពីមហាមិត្តចិន ដើម្បីធ្វើការរៀបចំសាងសង់ឡើងវិញតែម្តង។

ជាមួយគ្នានេះ លោកទេសរដ្ឋមន្រ្តីស៊ុន ចាន់ថុលបានបង្ហើបឲ្យដឹងផងដែរថា ផ្លួវជាតិលេខ៣បានបញ្ចប់ ការស្ថាបនាទាំងស្រុងហើយ ដោយស ម្តេច​តេជោហ៊ុន សែននាយករដ្ឋមន្រ្តីនៃកម្ពុជា នឹងអញ្ជើញចូលរួមជាអធិបតី ក្នុងពិធី ក្នុងសម្ភោធបើកឲ្យប្រើប្រាស់ផ្លួវនេះជាផ្លូវការ នៅថ្ងៃទី២ មិនាខាងមុខនេះ៕