ដោយៈសិរី ជេស៊ីកា

ភ្នំពេញៈ គម្រោងរមណីយដ្ឋានលំហែរ ដីឡូត៍ខ្នាតធំ និងផ្សារទំនើបបណ្តែតទឹកនឹងត្រូវសាងសង់លើផ្ទៃដី៤០ហិកតា ក្នុងក្រុងកំពតនាពេលឆាប់ៗខាងមុខនេះ។

បើតាមអ្នកវិនិយោគគំរោងដែលដាក់ឈ្មោះ Kampot River Park បានបង្ហើបឲ្យដឹងកាលពីល្ងាចថ្ងៃទី២៤ វិច្ឆិកាកន្លងមកថា គំរោងនេះស្ថិតនៅក្នុងផែនការមេ ដែលបាននិងកំពុងរៀបចំ ដោយវាមានទីតាំងនៅចម្ងាយ ប្រមាណ៣គីឡូម៉ែត្រពីរង្វង់មូលធុរេន ក្នុងទីក្រុងកំពត។

លោកឧកញ៉ាតេង រិទ្ឋីអគ្គនាយកក្រុមហ៊ុន R Investment Group ដែលកំពុងរៀបចំគម្រោងនេះបានមានប្រសាសន៍ឲ្យដឹងថា ជាមួយនឹងផែនការចូលររួមលើកស្ទួយទេសចរ​ណ៍ក្នុងខេត្តកំពត លោកបាននិងកំពុងទាក់ទាញអនិកជនខ្មែររស់នៅបរទេស ចូលមករស់នៅ និងវិនិយោគនៅកម្ពុជាវិញ។

 

លោកបន្តថា "គំរោងនេះ មានដីឡូត៍ទំហំ២០គុណ៣០ម៉ែត្រ ដែលមានផ្លូវពីមុខ និងព្រែកពីខាងក្រោយ សម្រាប់គ្រប់ដីឡូត៍ទាំងអស់"។

លោកឧកញ៉ាបានបន្តថា គំរោងនេះមានផ្សារបណ្តែតទឹក មានសណ្ឋាគារ ភោជនី​យដ្ឋានលំដាប់ផ្កាយ៥ចំនួន៤ និងលំដាប់ផ្កាយពីរចំនួនពីរ ជាមួយនឹងផ្លូវ ស្ពាន និងរៀបចំឡើងតាមស្តង់ដាអន្តរជាតិ ដោយមានដៃគូសហការពីក្រៅប្រទេស។

លោកឧកញ៉ាតេង រិទ្ឋីបានបន្តថា "អ្វីដែលលោកធ្វើគឺជាការជម្រុញសេដ្ឋកិច្ច តាមរយៈវិស័យទេសចរណ៍ ជាខេត្តមានសក្តានុពលលើធនធានធម្មជាតិដ៏ស្រស់ត្រកាល"។​លោកបន្តថា "គំរោងនេះនឹងបើកសម្ភោធនៅពេលចុងឆ្នាំនេះ ប៉ុន្តែលោកមិនទាន់បង្ហើបឲ្យ​ដឹងពីតម្លៃគំរោងដីឡូត៍និមួយៗនៅឡើយទេ៕