ដោយៈជេស៊ីកា

ភ្នំពេញៈ ច្បាប់វិនិយោគថ្មី ដែលទើបអនុម័តឲ្យប្រើប្រាស់កាលពីពេលថ្មីៗនេះ បានផ្តល់នូវមូលដ្ឋានសំខាន់ និងលើកទឹកចិត្តជាច្រើនដល់អ្នកវិនិយោគជាតិ និងអន្តរជាតិ។

តើផ្នែកអ្វីខ្លះត្រូវបានលើកទឹកចិត្ត? ការពិតការលើកទឹកចិត្តក្នុងច្បាប់នេះមាន៣ប្រភេទដូចជា៖

ការលើកទឹកចិត្តមូលដ្ឋាន
ការលើកទឹកចិត្តនេះមាន២ជម្រើស អាស្រ័យលើថាវិនិយោគិន ជ្រើសរើសមួយណា ក្នុងនោះជម្រើសទី១ គឺលើកលែងពន្ធលើប្រាក់ចំណូលរយៈពេលពី៣ឆ្នាំ ដល់៩ឆ្នាំ អាស្រ័យទៅតាមវិស័យ និងសកម្មភាពវិនិយោគ ដោយគិតចាប់ពីពេលដែលទទួលបានប្រាក់ចំណូលលើកដំបូង។

ចំណែកឯជម្រើសទី២ គឺអ្នកវិនិយោគទទួលបានសិទ្ធិកាត់កង ចំណាយមូលធន តាមរយៈការរំលស់ពិសេស និងសិទ្ធិកាត់កងរហូតដល់២០០ភាគរយ លើចំណាយសំខាន់ៗផ្សេងទៀត សម្រាប់រយៈពេលរហូតដល់៩ឆ្នាំ និងការលើកទឹកចិត្តផ្សេងៗទៀតផងដដែរ។

ការលើកទឹកចិត្តបន្ថែម
គ.ល.គ អាចទទួលបានការកាត់កងចំណាយ ក្នុងអត្រារហូតដល់១៥០ភាគរយ ទៅលើចំណា​យពាក់ព័ន្ធទៅនឹងការស្រាវជ្រាវ ការផ្តល់ការបណ្ដុះបណ្ដាល និងការចំណា​យទៅលើមធ្យោបាយដឹកជញ្ជូន ការសាងសង់កន្លែងស្នាក់នៅ អាហារដ្ឋាន និងទារកដ្ឋាន។

រដ្ឋាភិបាលក៏លើកលែងអាករលើតម្លៃបន្ថែម ចំពោះការទិញធាតុចូលផលិតកម្មដែលត្រូវបានផលិតនៅក្នុងស្រុក ក្នុងគោលបំណងផ្សារភ្ជាប់ ផលិតករក្នុងស្រុកនៅនឹងខ្សែច្រវាក់ផលិតកម្ម របស់គម្រោងវិនិយោគ ក៏ដូចជា ការជំរុញការប្រើប្រាស់ផលិតផលក្នុងស្រុក។

ការលើកទឹកចិត្តពិសេស
រដ្ឋធ្វើការកំណត់ដោយឡែកក្នុងច្បាប់ស្តីពី ការគ្រប់គ្រងហិរញ្ញវត្ថុ អាស្រ័យតាមវិស័យ និងសកម្មភាព ដែលរដ្ឋយល់ថា មានសក្តានុពលដល់ការអភិវឌ្ឍសេដ្ឋកិច្ច និងសង្គមជាដើម៕